Եվրասիա միջազգային համալսարանը հիմնադրվել է 1996 թ.-ին Երևանի Մխիթար Գոշ միջազգային համալսարան անվամբ (լիցենզիա թիվ 107): 2002 թ.-ի մարտի13-ին, ՀՀ կրթության և գիտության նախարարության որոշմամբ, ստացել է պետական հավատարմագիր և համալսարանին տրված է պետական նմուշի դիպլոմ շնորհելու լիազորություն: Այն «Եվրասիա միջազգային համալսարան (ԵՄՀ)» վերանվանվել է 2004 թ.-ի օգոստոսին: Բուհը միավորված ազգերի կրթական, գիտական, մշակութային կազմակերպության (UNESCO) համալսարանների միջազգային ասոցիացիայի և «Հավատարմագրված բուհերի միության» անդամ է:   

Բարձրագույն կրթական հաստատության ստեղծման գաղափարին Եվրասիա միջազգային համալսարանի հիմնադիրները մեծ դժվարությամբ հանգեցին: Հիմնական խնդիրը, որը նպաստեց բուհի ստեղծման պատասխանատու որոշման կայացմանը, ՀՀ-ում բարձրագույն ուսումնական հաստատությունների աճին զուգընթաց արտասահման ուսանելու մեկնողների թվի աճն էր և «ուղեղների արտահոսքը»: Ըստ համալսարանի հիմնադիրների, վաղուց արդեն հնարավոր էր արտասահմանյան կրթական հաստատությունների որակական լավագույն առանձնահատկությունները` ուսուցման մեթոդները, կրթական տեխնոլոգիաները, կրթության որակի գնահատման մեթոդաբանությունը, և դրանցում առկա կրթական մշակույթը ներդնել ՀՀ բուհերում: Հայաստանում տեսանելի էր «դարի զարկերակին ձեռքը մշտապես պահող» բուհի առկայության բացը, որը լրացնելու մեծագույն ցանկությունն էր, որ ստիպեց հիմնադիրներին, այնուամենայնիվ, կայացնել պատասխանատու որոշումը ու հիմնադրել Եվրասիա միջազգային համալսարանը:

Համալսարանը հիմնադրման օրվանից ի վեր փորձում է արտասահմանում ուսանելու հնարավորություն չունեցողների համար դառնալ համանման հնարավորություն հայրենիքում, իսկ արտասահմանում կրթություն ստացողների ու վերապատրաստվողների համար (համալսարանն իր լավագույն ուսանողների և աշխատակիցների համար հաճախ է նման հնարավորություն ստեղծում) լինել մեկն այն մեկնակետերից, որտեղից սկսվում է հայրենիքի զարգացումը: