Ի աջակցություն արցախցի ուսանողների, ովքեր ստեղծված իրավիճակում հնարավորություն չունեն մասնակցելու բակալավրիատի և մագիստրատուրայի դասերին այն բուհերում, որտեղ սովորում են, Եվրասիա միջազգային համալսարանը ընձեռում է հնարավորություն՝ անվճար միանալու բուհի ընթացիկ առցանց դասընթացներին:
Դասընթացների մեկնարկին ընդառաջ՝ այսօր՝ ս.թ. հոկտեմբերի 29-ին, ընդհանուր ծանոթացման և խորհրդատվության նպատակով Microsoft Teams ծրագրային հարթակում հանդիպեցին Արցախի բուհերի ուսանողները և Եվրասիա միջազգային համալսարանի վարչական աշխատակիցները:
Արցախցիներին հարթակում առաջինը ողջունեց ԵՄՀ ռեկտոր, աշխ.գիտ.դոկտոր, պրոֆեսոր Սուրեն Օհանյանը,-«Մեր պատմության ողջ ընթացքում մենք մի ձեռքով պահել ենք գիրքն ու գրիչը, մյուսով՝ զենքը: Մեր ժողովուրդը կրթության ժողովուրդ է, որն օժտված է գիտելիքի ու ինտելեկտուալ բացառիկ ռեսուրսով, և ցանկացած իրադրության պայմաններում մենք չենք կարող ընդհատել մեր մասնագիտական գործունեությունը: Այս նպատակով մենք սիրով նախաձեռնեցինք կազմակերպել արցախցիների ուսումնառության գործընթացի շարունակականությունը մեր բուհի մասնագիտություններին համապատասխան: Սիրելի՛ ուսանողներ, դուք պարտավոր եք շարունակել ձեր կրթություն: Վստահ եղե՛ք, բուհը ձեր կողքին է, մենք միասին դեռ շատ անելիքներ ունենք ու պետք է անցնենք կարևոր մի ճանապարհ, ուստի նվիրվե՛ք կրթական մասնագիտական գործունեությանը և մենք՝ որպես մեծ ու զորեղ հայ ազգ, միասին կստանձնենք համազգային խնդիրների լուծման գործը»:
Առցանց հարթակում ուսանողները հանդիպեցին նաև մասնագիտական ամբիոնների վարիչներին, որոնք ներկայացրին ուսումնառության գործընթացը, տրամադրեցին խորհրդատվություն մասնագիտական առարկաների վերաբերյալ:
Հիշեցնենք, որ դասընթացները կմեկնարկեն նոյեմբերի 2-ից, իսկ հաջողությամբ ավարտելու դեպքում համալսարանը ուսանողներին կտրամադրի տեղեկանք՝ հետագայում կրեդիտների փոխանցումը կազմակերպելու նպատակով։