Ս.թ. փետրվարի 5-ին ավարտվեց Եվրասիա միջազգային համալսարանի և Էրազմուս Պլյուս ՀՀ Բարձրագույն կրթության բարեփոխումների փորձագետների խմբի նախաձեռնությամբ կազմակերպած «Միջազգայնացմանը միտված համալսարանական ռազմավարությունների խթանումը միջազգային բենչմարքինգի միջոցով» թեմայով միջազգային երկօրյա սեմինար-վերապատրաստումը: Միջազգային աշխատաժողովի երկրորդ օրվա մեկնարկն ազդարարեց Հայաստանում Էրազմուս+ ազգային գրասենյակի համակարգող Լանա Կառլովան: Նա կարևորեց միջազգայնացումը և Էրազմուսի դերը այս գործընթացում: Լ.Կառլովան անհրաժեշտություն համարեց ձևավորել եվրոպացի ուսանողների և դասախոսների շրջանում հայկական բարձրագույն կրթությունը տարածականացնելու և գրավիչ դարձնելու մշակույթ և որպես ձեռքբերում՝ նշեց կարճաժամկետ այսօրինակ աշխատաժողովների կազմակերպումը, որոնք հնարավորություն են տալիս քննարկելու խնդիրներից բխող արդիական թեմաներ միաջազգային փորձագետների հետ:
Աշխատանքները շարունակեց Բելգիայի Ակադեմիական համագործակցության ասոցիացիայի (ACA) փոխտնօրեն Իրինա Ֆերենցը: Նա ներկայացրեց ռազմավարության, ցուցանիշների և բենչմարքինգի օրինակներ ազգային և ինստիտուցիոնալ մակարդակներում: Այնուհետև մասնակիցները թիմային աշխատանքի միջոցով ներքոհիշյալ հարցերի հիման վրա կազմակերպեցին քննարկում.
- որքանով է ազգային հետազոտական քաղաքականությունը համապատասխանում համալսարանի միջազգային քաղաքականությանը,
- որքանով է բարձրագույն կրթության իրականացումը կապակցված հայաստանյան համալսարաններում իրականացվող դասավանդման և ուսուցման հետ,
- ինչպես կարող են նվազեցվել միջազգայնացմանը միտված խոչընդոտները:
Օրակարգով զեկուցմամբ հանդես եկավ Հայաստանում Ամերիկյան համալսարանի փոխնախագահի օգնական Անահիտ Օրդյանը, որը ներկայացրեց բուհի միջազգայնացման ռազմավարության լավագույն փորձը՝ մարտահրավերները, մոտեցումները, տեսլականը:
Հանդիպումն ամփոփվեց քննարկումների արդյունքնում սահմանված առաջարկությունների ներկայացմամբ. այն է՝ կազմակերպել աշխատաժողովներ քննարկման մասնակից համալսարաններում՝ փոխանակվելով լավագույն փորձով և իրականացնելով սեփական բուհերի բենչմարքինգ :
Հավելենք, որ որպես սեմինարի մասնակիցներ ներգրավված էին ՀՀ Կրթության և գիտության նախարարության ներկայացուցիչները, բարձրագույն կրթության քաղաքականության մշակողները, բարձրագույն ուսումնական հաստատությունների վարչական անձնակազմը, միջազգային կապերի պատասխանատուները, դասախոսներ, ուսանողական խորհուրդների ղեկավարները: