Եվրասիա միջազգային համալսարանի «Քաղաքացիական իրավունք և դատավարություն» մասնագիտության մագիստրատուրայի ուսանողուհի Լամարա Աֆրիկյանը էրազմուս+ ուսանողների փոխանակման միջազգային ծրագրով մեկնել է Լեհաստան, որտեղ 2020-2021 ուստարվա գարնանային կիսամյակում ուսումնառությունը կստանա Վարշավայի բնական գիտությունների համալսարանում:
Լամարան իր ջերմ ողջույններն է հղում Վարշավա մայրաքաղաքից և մեզ հետ կիսվում իր տպավորություններով.
«Ջերմ ողջույններ Լեհաստանից:
Լեհաստանում մեր ժամանելուց մեկ շաբաթ հետո Կորոնովիրուսի համաճարակի վատթարացման պատճառով դասերը ամբողջությամբ ընթանում են առցանց։ Չնայած այս հանգամանքին՝ այստեղ դասերը բավականին ինտեսնիվ և բովանդակությամբ հետաքրքիր են։ Առցանց տարբերակով սովորելը նոր հնարավորություն է ընձեռում սոցիալական կապերի ստեղծման, խմբային աշխատանքների ժամանակ՝ համագործակցության տարբեր ձևեր գտնելու համար։
Չնայած սահմանափակումներին՝ հասցրել ենք որոշ տեսարժան վայրեր այցելել։ Արտալսարանային զբաղվածության հարցում օգնում է ESN-ը, որը կազմակերպում է բացօթյա միջոցառումներ՝ պահպանելով անվտանգության բոլոր կանոնները։
Կարծում եմ՝ փորձառությունս բավականին յուրօրինակ է, ուստի վերադառնալուն պես պարտադիր կկիսվեմ համակուրսեցիներիս և բուհի այլ ուսանողների հետ»: