2018թ-ի մարտի 28-ին Եվրասիա միջազգային համալսարանում կայացավ իրավագիտության ամբիոնի կողմից կազմակերպված «Արբիտրաժը և մեդիացիան որպես քաղաքացիաիրավական վեճերի լուծման այլընտրանքային եղանակներ Հայաստանի Հանրապետությունում» թեմայով գիտագործնական սեմինար, որը վարեց իրավագիտության ամբիոնի դասախոս Արմինե Չոբանյանը:
Գիտագործնական սեմինարը վերաբերում էր քաղաքացիաիրավական վեճերի քննության այլընտրանքային եղանակներին, որտեղ ամփոփ ներկայացվեցին առևտրային արբիտրաժի և մեդիացիայի գործընթացներն իրենց համապատասխան ընթացակարգերով:
Ա. Չոբանյանն անդրադարձավ նաև առևտրային արբիտրաժի և մեդիացիայի որոշումների պարտադիր կամ ոչ պարտադիր լինելու հանգամանքներին:
Ներկայացվեց նաև վերջին տարիներին ուշադրության կենտրոնում գտնվող իրավաբանական պրակտիկայում վեճերի լուծման այլընտրանքային մեթոդներին առնչվող խնդիրները, որն իր հերթին պայմանավորված է հիմնականում թե´ միջազգային արբիտրաժի` որպես միջազգային առևտրատնտեսական հարաբերություններից բխող վեճեր լուծող մարմնի դերի ու հեղինակության աճով ,և թե´ մեդիացիայի` որպես միջազգային վեճերի լուծման լավագույն մեթոդի ընդլայնմամբ:
Ա. Չոբանյանի կողմից մեջբերվեց այն միտքը, որ զարգացած իրավական համակարգ ունեցող երկիր, իրականացնելով արբիտրաժային կենտրոնում գործառնվող վեճերի լուծման բոլոր դրական կողմերը, նպաստում է իր երկրում արբիտրաժային և մեդիացիոն (միջնորդական) մշակույթի զարգացմանը:
Հավելենք, որ վերջին ժամանակներում Հայաստանի Հանրապետությունում ևս արժևորվում է վեճերի լուծման այլընտրանքային եղանակների օգտագործման (պրակտիկ կիրառման) նշանակությունը:
Ներկաները, փաստելով թեմայի արդիականությունը, ոգևորված հնչեցրին բազմապիսի հետաքրքրաշարժ հարցեր, որոնց հետազոտող-սեմինարավարը տվեց սպառիչ պատասխաններ: